PARAU PIA : Tē faarii nei ia faaòrehia te parau tuìte « CAPES Reo māòhi »

I mua i te mau haapurororaa tuutuu òre a te mau veà i teie mau mahana nei no te parau tuìte CAPES Reo māòhi, tē uiui nei te feruriraa o te mau tià o te Puna Reo e tē hinaaro nei e horoà i te tahi manaò hohonu no tē haaferuri i te feiā e àro pāpū nei, na roto i tā rātou mau òreroraa navenave mau, no tē pāruru i tō tātou reo e i tō tātou hiroà.

Na mua roa, àita e nehenehe e faaòre i te CAPES Reo māòhi no te mea,àita ihoā teie CAPES i teie mahana. Tē parauhia nei e parau tuìte CAPES teie no te mau reo o teie mau pae fenua, i te reo tahiti ihoā rā. I te mātāmua, e piihia ô ia CAPES reo tahiti-reo farāni, e auraa ïa tō na. Tē hinaaro nei mātou ia faanahohia te mau parau tuìte pāpū no te haapiiraa i tō tātou mau reo māòhi, èi mau parau tuìte e haapāpū mai i te àravehi o te òrometua i te pae o te reo e tō na àravehi no te haapiiraa i taua mau reo nei.

Tē hinaaro nei mātou ia àmui teie nahoà rahi i mua i te hoê àroraa pāpū maoti rā te èreraa tō tātou mau tamarii māòhi i tō rātou reo e tō rātou hiroà i te mau matahiti atoà, na roto i te autā òre o te taata. Ia riro te reira èi àroraa pāpū i te mea ē ia mou te reo e te hiroà o te nunaa, ua mou atoà ïa tō na varua, ua mate.

I roto i te matuturaa rahi i tupu i te matahiti 2009 i tō tātou nei fenua, ua matara mai te tahi mau manaò e ua horoàhia te tahi mau rēni no tē arataì i te haapiiraa o tō tātou reo. Tei hea atu ra teie mau feruriraa i teie mahana ?

Ia tuea te tiàraa o tō tātou reo, i te tiàraa o te reo farāni, mai tei faaotihia i te mau matahiti 1980 ra, èère ānei te reira te àroraa mātāmua roa i teie mahana ?